hum dard-e-nihan ko mahfil mein ruswa-e-hikayat kar na sake

ham dard-e-nihāñ ko mahfil meñ rusvā-e-hikāyat kar na sake

kahne ko bahut kuchh thā lekin kuchh un se ḳhitābat kar na sake

ai husn zarā dam bhar ke liye kuchh shoḳh tujhe bhī honā thā

do dil the fidā aapas meñ magar iz.hār-e-mohabbat kar na sake

guzre hue lamhoñ kī yādeñ ab shauq-e-vafā se kahtī haiñ

jo shai thī qarīb-e-qalb-o-jigar us shai se rifāqat kar na sake

har shauq baḌhā kar sapne meñ zahmat to uThā.ī rāhoñ kī

pahuñche to dar-e-ka.aba pe magar ka.abe kī ziyārat kar na sake

siine meñ ḳhalish hai furqat kī betāb tamanna hai merī

jo ham se mohabbat karte the ham un pe ināyat kar na sake

chanchal bhī vo the chālāk bhī the par sharm-o-hayā bhī aisī thī

ham man ke purāne paapī bhī kuchh un se sharārat kar na sake

vaa.iz ne kahā thā zabt karo jazbāt-e-mohabbat ko lekin

ham us kī hidāyat par chal kar is dil kī hifāzat kar na sake

duniyā ke ġhamoñ kā ḳhauf nahīñ bebāk musāfir ko 'shāfī'

dam bhar ke liye palkoñ ke tale afsos iqāmat kar na sake

hum dard-e-nihan ko mahfil mein ruswa-e-hikayat kar na sake

kahne ko bahut kuchh tha lekin kuchh un se KHitabat kar na sake

ai husn zara dam bhar ke liye kuchh shoKH tujhe bhi hona tha

do dil the fida aapas mein magar izhaar-e-mohabbat kar na sake

guzre hue lamhon ki yaaden ab shauq-e-wafa se kahti hain

jo shai thi qarib-e-qalb-o-jigar us shai se rifaqat kar na sake

har shauq baDha kar sapne mein zahmat to uThai rahon ki

pahunche to dar-e-kaba pe magar kabe ki ziyarat kar na sake

sine mein KHalish hai furqat ki betab tamanna hai meri

jo hum se mohabbat karte the hum un pe inayat kar na sake

chanchal bhi wo the chaalak bhi the par sharm-o-haya bhi aisi thi

hum man ke purane papi bhi kuchh un se shararat kar na sake

waiz ne kaha tha zabt karo jazbaat-e-mohabbat ko lekin

hum us ki hidayat par chal kar is dil ki hifazat kar na sake

duniya ke ghamon ka KHauf nahin bebak musafir ko 'shafi'

dam bhar ke liye palkon ke tale afsos iqamat kar na sake