hum dasht se har sham yahi soch ke ghar aae

ham dasht se har shaam yahī soch ke ghar aa.e

shāyad ki kisī shab tire aane kī ḳhabar aa.e

mālūm kise shahr-e-tilismāt kā rasta

kuchh duur mire saath to mahtāb-e-safar aa.e

is phuul se chehre kī talab rāhat-e-jāñ hai

pheñke koī patthar bhī to ehsāñ mire sar aa.e

tā phir na mujhe tīra-nasībī kā gilā ho

ye sub.h kā sūraj mirī āñkhoñ meñ utar aa.e

ab aage alam aur koī hāthoñ se le le

ham shab ke musāfir the chale tā-ba-sahar aa.e

hum dasht se har sham yahi soch ke ghar aae

shayad ki kisi shab tere aane ki KHabar aae

malum kise shahr-e-tilismat ka rasta

kuchh dur mere sath to mahtab-e-safar aae

is phul se chehre ki talab rahat-e-jaan hai

phenke koi patthar bhi to ehsan mere sar aae

ta phir na mujhe tira-nasibi ka gila ho

ye subh ka suraj meri aankhon mein utar aae

ab aage alam aur koi hathon se le le

hum shab ke musafir the chale ta-ba-sahar aae