ہم دل افگاروں پہ اتنی سی عنایت بھی نہیں

ہم دل افگاروں پہ اتنی سی عنایت بھی نہیں

ان کی جانب سے تڑپنے کی اجازت بھی نہیں

اس روش کو ہائے اس کافر ادا کی کیا کہوں

مجھ سے نفرت بھی نہیں ہے اور الفت بھی نہیں

میرے نالوں سے لرزتا تھا کبھی چرخ کہن

اب تو فریاد و فغاں کرنے کی طاقت بھی نہیں

جو شجر خون جگر سے ہم نے سینچے تھے کبھی

ان کے سائے میں ٹھہرنے کی اجازت بھی نہیں

اللہ اللہ کیسا وقت آیا ہے گلشن پر نریشؔ

دل کشی تو دل کشی پھولوں میں نکہت بھی نہیں