ہم اعتکاف کوچۂ جاناں نہ کر سکے

ہم اعتکاف کوچۂ جاناں نہ کر سکے

داغ جگر کو شعلۂ‌‌ رقصاں نہ کر سکے

آئی بہار جب بھی رہے دل فگار ہم

ہم اعتبار فصل بہاراں نہ کر سکے

اوروں کے کام آئے شریک الم ہوئے

لیکن ہم اپنے درد کا درماں نہ کر سکے

ہم کو رضائے دوست کی خاطر عزیز تھی

وہ جب ملے تو ان کو پشیماں نہ کر سکے

غیروں کے جامہ پر رہی احباب کی نظر

اپنا رفوئے چاک گریباں نہ کر سکے

کچھ تو مداوا کیجئے ہو کر شریک غم

انساں نہیں جو خدمت انساں نہ کر سکے

غنچوں میں بھی انہیں کا تبسم ہے آشکار

یہ اور بات ہے کوئی عرفاں نہ کر سکے

گزری تمام عمر اندھیرے میں اے زکیؔ

ہم شمع آرزو کو فروزاں نہ کر سکے