hum e’takaf-e-kucha-e-jaanan na kar sake

ham e’takāf-e-kūcha-e-jānāñ na kar sake

dāġh-e-jigar ko sho’la-e-raqsāñ na kar sake

aa.ī bahār jab bhī rahe dil-figār ham

ham e'tibār-e-fasl-e-bahārāñ na kar sake

auroñ ke kaam aa.e sharīk-e-alam hue

lekin ham apne dard kā darmāñ na kar sake

ham ko razā-e-dost kī ḳhātir 'azīz thī

vo jab mile to un ko pashemāñ na kar sake

ġhairoñ ke jaame par rahī ahbāb kī nazar

apnā rafū-e-chāk-e-garebāñ na kar sake

kuchh to mudāvā kījiye ho kar sharīk-e-ġham

insāñ nahīñ jo ḳhidmat-e-insāñ na kar sake

ġhunchoñ meñ bhī unhīñ kā tabassum hai āshkār

ye aur baat hai koī ‘irfāñ na kar sake

guzrī tamām umr añdhere meñ ai 'zakī'

ham sham'-e-ārzū ko farozāñ na kar sake

hum e’takaf-e-kucha-e-jaanan na kar sake

dagh-e-jigar ko sho’la-e-raqsan na kar sake

aai bahaar jab bhi rahe dil-figar hum

hum e'tibar-e-fasl-e-bahaaran na kar sake

auron ke kaam aae sharik-e-alam hue

lekin hum apne dard ka darman na kar sake

hum ko raza-e-dost ki KHatir 'aziz thi

wo jab mile to un ko pasheman na kar sake

ghairon ke jame par rahi ahbab ki nazar

apna rafu-e-chaak-e-gareban na kar sake

kuchh to mudawa kijiye ho kar sharik-e-gham

insan nahin jo KHidmat-e-insan na kar sake

ghunchon mein bhi unhin ka tabassum hai aashkar

ye aur baat hai koi ‘irfan na kar sake

guzri tamam umr andhere mein ai 'zaki'

hum sham'-e-arzu ko farozan na kar sake