hum ek KHwab liye mah o sal se guzre

ham ek ḳhvāb liye maah o saal se guzre

hazāroñ rañj hazāroñ malāl se guzre

hameñ milā jo koī āsmāñ to sūrat-e-māh

na jaane kitne uruuj o zavāl se guzre

kabhī ġharīboñ kī aahoñ meñ kī basar ham ne

kabhī amīroñ ke jāh-o-jalāl se guzre

vo be-sahārā se kuchh log jaan se bezār

ḳhabar milī hai ki auj-e-kamāl se guzre

ye zindagī bhī ajab raah thī ki ham jis se

qadam baḌhāte jhijakte niDhāl se guzre

haqīqateñ to nigāhoñ ke sāmne thiiñ magar

ham ek umr fareb-e-ḳhayāl se guzre

hikāyat-e-gul-o-bulbul pe ḳhanda-zan haiñ vahī

jo shām-e-hijr na sub.h-e-visāl se guzre

gale lagātī hai manzil unheñ bhī ai 'jazbī'

qadam qadam pe jo ḳhauf-e-ma.āl se guzre

hum ek KHwab liye mah o sal se guzre

hazaron ranj hazaron malal se guzre

hamein mila jo koi aasman to surat-e-mah

na jaane kitne uruj o zawal se guzre

kabhi gharibon ki aahon mein ki basar hum ne

kabhi amiron ke jah-o-jalal se guzre

wo be-sahaara se kuchh log jaan se bezar

KHabar mili hai ki auj-e-kamal se guzre

ye zindagi bhi ajab rah thi ki hum jis se

qadam baDhate jhijakte niDhaal se guzre

haqiqaten to nigahon ke samne thin magar

hum ek umr fareb-e-KHayal se guzre

hikayat-e-gul-o-bulbul pe KHanda-zan hain wahi

jo sham-e-hijr na subh-e-visal se guzre

gale lagati hai manzil unhen bhi ai 'jazbi'

qadam qadam pe jo KHauf-e-maal se guzre