hum hain aur shughl-e-ishq-bazi hai

ham haiñ aur shuġhl-e-ishq-bāzī hai

kyā haqīqī hai kyā majāzī hai

duḳhtar-e-raz nikal ke miinā se

kartī kyā kyā zabāñ-darāzī hai

ḳhat ko kyā dekhte ho aa.ine meñ

husn kī ye adā-tarāzī hai

hindu-e-chashm tāq-e-abrū meñ

kyā banā aan kar namāzī hai

nazr deñ nafs-kush ko duniyā-dār

vaah kyā terī be-niyāzī hai

but-e-tannāz ham se ho nā-sāz

kārsāzoñ kī kārsāzī hai

sach kahā hai kisī ne ye ai 'zauq'

māl-e-mūzī nasīb-e-ġhāzī hai

hum hain aur shughl-e-ishq-bazi hai

kya haqiqi hai kya majazi hai

duKHtar-e-raz nikal ke mina se

karti kya kya zaban-daraazi hai

KHat ko kya dekhte ho aaine mein

husn ki ye ada-taraazi hai

hindu-e-chashm taq-e-abru mein

kya bana aan kar namazi hai

nazr den nafs-kush ko duniya-dar

wah kya teri be-niyazi hai

but-e-tannaz hum se ho na-saz

karsazon ki karsazi hai

sach kaha hai kisi ne ye ai 'zauq'

mal-e-muzi nasib-e-ghazi hai