ہم ہیں دیوانے وہ ہیں فرزانے

ہم ہیں دیوانے وہ ہیں فرزانے

کس کا کیا حال ہے خدا جانے

پیاسے پیاسے ہیں خود ہی پیمانے

اجڑے اجڑے ہوئے ہیں میخانے

کیسے سمجھوں میں اجنبی خود کو

لوگ ملتے ہیں جانے پہچانے

ان کو سینے سے ہم لگاتے ہیں

جن کو ٹھکرا دیا ہے دنیا نے

چشم ساقی کی مہربانی سے

رقص کرنے لگے ہیں پیمانے

آپ کو وقت خود بتا دے گا

کون اپنے ہیں کون بیگانے

رسم کیسی ہے یہ محبت کی

آگ میں جل رہے ہیں پروانے

زندگی اے ضمیرؔ اس کی ہے

تیری آواز کو جو پہچانے