hum hain manzar siyah aasmanon ka hai

ham haiñ manzar siyah āsmānoñ kā hai

ik itaab aate jaate zamānoñ kā hai

ek zahrāb-e-ġham siina siina safar

ek kirdār sab dāstānoñ kā hai

kis musalsal ufuq ke muqābil haiñ ham

kyā ajab silsila imtihānoñ kā hai

phir vahī hai hameñ miTTiyoñ kī talāsh

ham haiñ uḌtā safar ab Dhalānoñ kā hai

kaun se ma.arke ham ne sar kar liye

ye nasha sā hameñ kin takānoñ kā hai

ye alag baat vo kuchh batā.e nahīñ

lekin us ko pata sab ḳhazānoñ kā hai

sab chale duur ke pāniyoñ kī taraf

kyā nazāra khule bādbānoñ kā hai

us kī nazroñ meñ saare maqāmāt haiñ

par use shauq andhī uḌānoñ kā hai

aao 'bānī' ki ḳhvāja ke dar ko chaleñ

āstāna hazār āstānoñ kā hai

hum hain manzar siyah aasmanon ka hai

ek itab aate jate zamanon ka hai

ek zahrab-e-gham sina sina safar

ek kirdar sab dastanon ka hai

kis musalsal ufuq ke muqabil hain hum

kya ajab silsila imtihanon ka hai

phir wahi hai hamein miTTiyon ki talash

hum hain uDta safar ab Dhalanon ka hai

kaun se marke hum ne sar kar liye

ye nasha sa hamein kin takanon ka hai

ye alag baat wo kuchh batae nahin

lekin us ko pata sab KHazanon ka hai

sab chale dur ke paniyon ki taraf

kya nazara khule baadbanon ka hai

us ki nazron mein sare maqamat hain

par use shauq andhi uDanon ka hai

aao 'bani' ki KHwaja ke dar ko chalen

aastana hazar aastanon ka hai