hum hain tufan-e-hawadis se guzarne wale

ham haiñ tūfān-e-havādis se guzarne vaale

ham nahīñ mauj-e-balā-ḳhez se Darne vaale

aap jī bhar ke dil-e-zār pe bedād kareñ

ham kisī taur shikāyat nahīñ karne vaale

kaash tū dard-e-mohabbat se shanāsā hotā

ahd-o-paimān-e-mohabbat se mukarne vaale

phuul hī phuul nahīñ is meñ ka.ī ḳhaar bhī haiñ

dekh kar rāh-e-mohabbat se guzarne vaale

terī is ḳhaas adā par huuñ dil-o-jāñ se nisār

merī āñkhoñ se mire dil meñ utarne vaale

aisī tanzīm-e-gulistāñ kā ḳhudā hī hāfiz

ab ye tinke haiñ kisī roz bikharne vaale

ab to be-kār hai har sa.ī-e-musalsal 'āsī'

ab nahīñ gesū-e-hālāt sañvarne vaale

hum hain tufan-e-hawadis se guzarne wale

hum nahin mauj-e-bala-KHez se Darne wale

aap ji bhar ke dil-e-zar pe bedad karen

hum kisi taur shikayat nahin karne wale

kash tu dard-e-mohabbat se shanasa hota

ahd-o-paiman-e-mohabbat se mukarne wale

phul hi phul nahin is mein kai KHar bhi hain

dekh kar rah-e-mohabbat se guzarne wale

teri is KHas ada par hun dil-o-jaan se nisar

meri aankhon se mere dil mein utarne wale

aisi tanzim-e-gulistan ka KHuda hi hafiz

ab ye tinke hain kisi roz bikharne wale

ab to be-kar hai har sai-e-musalsal 'asi'

ab nahin gesu-e-haalat sanwarne wale