hum hi badlenge rah-o-rasm-e-gulistan yaro

ham hī badleñge rah-o-rasm-e-gulistāñ yaaro

ham se vābasta hai ta.amīr-e-bahārāñ yaaro

qurbat-e-kākul-o-ruḳhsār se jī tañg nahīñ

ik zarā chain to de gardish-e-daurāñ yaaro

laakh ham marhala-e-dār-o-rasan se guzre

zindagī se na hue phir bhī gurezāñ yaaro

ik thakā ḳhvāb ki siine meñ sulagtā hai abhī

ik dabī yaad ki hai nīsh-e-rag-e-jāñ yaaro

āmad-e-sub.h se māyūs nahīñ haiñ lekin

Das na le tīrgī-e-shām-e-ġharībāñ yaaro

aur kuchh duur ki thoḌī hai rah-e-jaur-o-sitam

aur kuchh der ki TuuTā dar-e-zindāñ yaaro

apnā dukh ho to 'riyāz' us kā mudāvā karte

haiñ sabhī sho.ala-ba-jāñ chāk-e-garebāñ yaaro

hum hi badlenge rah-o-rasm-e-gulistan yaro

hum se wabasta hai tamir-e-bahaaran yaro

qurbat-e-kakul-o-ruKHsar se ji tang nahin

ek zara chain to de gardish-e-dauran yaro

lakh hum marhala-e-dar-o-rasan se guzre

zindagi se na hue phir bhi gurezan yaro

ek thaka KHwab ki sine mein sulagta hai abhi

ek dabi yaad ki hai nish-e-rag-e-jaan yaro

aamad-e-subh se mayus nahin hain lekin

Das na le tirgi-e-sham-e-ghariban yaro

aur kuchh dur ki thoDi hai rah-e-jaur-o-sitam

aur kuchh der ki TuTa dar-e-zindan yaro

apna dukh ho to 'riyaz' us ka mudawa karte

hain sabhi shoala-ba-jaan chaak-e-gareban yaro