hum hi tanha na teri chashm ke bimar hue

ham hī tanhā na tirī chashm ke bīmār hue

is maraz meñ to ka.ī ham se giraftār hue

sīna-e-ḳhasta hamāre se hai ġhirbāl ko rashk

nāvak-e-ġham jigar-o-dil se zi-bas paar hue

bikne motī lage bāzār meñ kauḌī kauḌī

yaad meñ terī zi-bas chashm-e-guhar-bār hue

roz-e-avval ki tum aa misr-e-mohabbat ke biich

yūsuf-e-asr hue raunaq-e-bāzār hue

naqd-e-jān-o-dil-o-dīñ de ke liyā ham ne tumheñ

saikḌoñ ahl-e-havas garche ḳharīdār hue

ghar meñ le aa.e tumheñ chaah se karne shādī

ki tum is ġham-kade meñ sham-e-shab-tār hue

ruḳh-e-tābāñ se tumhāre ki hai ḳhurshīd-misāl

dar-o-dīvār sabhī matla'-e-anvār hue

DhūñDhte tum ko paḌe phirte the ham shahr-ba-shahr

ḳhvār-o-rusvā-e-sar-e-kūcha-o-bāzār hue

lillāhil-hamd ki muddat meñ tum ai nūr-e-nigāh

bā.is-e-raushnī-e-dīda-e-ḳhūñ-bār hue

ḳhāna-e-chashm meñ rakhte the shab-o-roz ki tum

qurrat-ul-ain hue rāhat-e-dīdār hue

dekh kar mehr-o-vafā o karam-o-lutf ko ham

jānte yuuñ the ki tum yār-e-vafādār hue

jis meñ tum hote ḳhushī so hī to ham karte the

par nahīñ jānte kis vāste bezār hue

ab hameñ chhoḌ ke yuuñ zār-o-nizār-o-ġhamgīñ

tum kahīñ aur hī jā yaañ se numūdār hue

ye to hargiz hī na thī tum se tavaqqo' ham ko

ki sitamgār dil-āzār jafā-kār hue

na vo iḳhlās-o-mohabbat hai na vo mehr-o-vafā

sheva-e-jaur-o-jafā-o-sitam iz.hār hue

yā vo altāf-o-karam thā ki sadā rahte the

ai gul-andām hamāre ga.e ke haar hue

is meñ hairāñ haiñ ki kyā aisī huī hai taqsīr

qatl karne ke ta.iiñ phirte ho tayyār hue

teġh-e-ḳhūñ-rez-ba-kaf ḳhanjar-e-burrāñ ba-miyāñ

har ghaḌī sāmne aa jaate ho ḳhūñḳhār hue

phir to kyā hai sunte ho uTho bismillāh

khīñch kar teġh ko aao jo sitamgār hue

varna dil khol ke lag jaao gale se pyāre

go ki ham qatl hī karne ke sazā-vār hue

utnī hī baat ke kahne meñ ki ik bosa do

aah ai shoḳh jo aise hī gunahgār hue

tauba karte haiñ qasam khāte haiñ sunte ho tum

phir nahīñ kahne ke aage ko ḳhabar-dār hue

pūchhtā kyā hai tū 'bedār' hamārā ahvāl

dām-e-ḳhūbāñ meñ phir ab aa.e giraftār hue

hum hi tanha na teri chashm ke bimar hue

is maraz mein to kai hum se giraftar hue

sina-e-KHasta hamare se hai ghirbaal ko rashk

nawak-e-gham jigar-o-dil se zi-bas par hue

bikne moti lage bazar mein kauDi kauDi

yaad mein teri zi-bas chashm-e-guhar-bar hue

roz-e-awwal ki tum aa misr-e-mohabbat ke bich

yusuf-e-asr hue raunaq-e-bazar hue

naqd-e-jaan-o-dil-o-din de ke liya hum ne tumhein

saikDon ahl-e-hawas garche KHaridar hue

ghar mein le aae tumhein chah se karne shadi

ki tum is gham-kade mein sham-e-shab-tar hue

ruKH-e-taban se tumhaare ki hai KHurshid-misal

dar-o-diwar sabhi matla'-e-anwar hue

DhunDhte tum ko paDe phirte the hum shahr-ba-shahr

KHwar-o-ruswa-e-sar-e-kucha-o-bazar hue

lillahil-hamd ki muddat mein tum ai nur-e-nigah

bais-e-raushni-e-dida-e-KHun-bar hue

KHana-e-chashm mein rakhte the shab-o-roz ki tum

qurrat-ul-ain hue rahat-e-didar hue

dekh kar mehr-o-wafa o karam-o-lutf ko hum

jaante yun the ki tum yar-e-wafadar hue

jis mein tum hote KHushi so hi to hum karte the

par nahin jaante kis waste bezar hue

ab hamein chhoD ke yun zar-o-nizar-o-ghamgin

tum kahin aur hi ja yan se numudar hue

ye to hargiz hi na thi tum se tawaqqo' hum ko

ki sitamgar dil-azar jafa-kar hue

na wo iKHlas-o-mohabbat hai na wo mehr-o-wafa

shewa-e-jaur-o-jafa-o-sitam izhaar hue

ya wo altaf-o-karam tha ki sada rahte the

ai gul-andam hamare gae ke haar hue

is mein hairan hain ki kya aisi hui hai taqsir

qatl karne ke tain phirte ho tayyar hue

tegh-e-KHun-rez-ba-kaf KHanjar-e-burran ba-miyan

har ghaDi samne aa jate ho KHunKHar hue

phir to kya hai sunte ho uTho bismillah

khinch kar tegh ko aao jo sitamgar hue

warna dil khol ke lag jao gale se pyare

go ki hum qatl hi karne ke saza-war hue

utni hi baat ke kahne mein ki ek bosa do

aah ai shoKH jo aise hi gunahgar hue

tauba karte hain qasam khate hain sunte ho tum

phir nahin kahne ke aage ko KHabar-dar hue

puchhta kya hai tu 'bedar' hamara ahwal

dam-e-KHuban mein phir ab aae giraftar hue