hum hue sare zamane se KHafa tere liye

ham hue saare zamāne se ḳhafā tere liye

zulm kyā kyā na sahe jān-e-adā tere liye

tere parvāne kī jaañ le ke rahā vo āḳhir

ham ne chāhat kā jalāyā jo diyā tere liye

ḳhud se baḌh kar bhī kabhī ham ne tujhe chāhā hai

lab pe raushan rahī har vaqt duā tere liye

raat din ham ne bahā.e haiñ lahū ke aañsū

kī hai manzūr sisakne kī adā tere liye

dostī tujh se jo kī ho ga.ī dushman duniyā

ishq ke naam pe kyā kyā na huā tere liye

terī har baat ko maanā kiye haamī bhar lī

ham hue paikar-e-taslīm-o-razā tere liye

terī ḳhātir kiyā samjhauta jahāñ se 'hāfiz'

ham ne bardāsht kī tauhīn-e-anā tere liye

hum hue sare zamane se KHafa tere liye

zulm kya kya na sahe jaan-e-ada tere liye

tere parwane ki jaan le ke raha wo aaKHir

hum ne chahat ka jalaya jo diya tere liye

KHud se baDh kar bhi kabhi hum ne tujhe chaha hai

lab pe raushan rahi har waqt dua tere liye

raat din hum ne bahae hain lahu ke aansu

ki hai manzur sisakne ki ada tere liye

dosti tujh se jo ki ho gai dushman duniya

ishq ke nam pe kya kya na hua tere liye

teri har baat ko mana kiye hami bhar li

hum hue paikar-e-taslim-o-raza tere liye

teri KHatir kiya samjhauta jahan se 'hafiz'

hum ne bardasht ki tauhin-e-ana tere liye