ہم انساں ہیں دل انساں کو تڑپانا نہیں آتا

ہم انساں ہیں دل انساں کو تڑپانا نہیں آتا

کرم کی شان رکھتے ہیں ستم ڈھانا نہیں آتا

مرے زخموں سے تم کب تک بچاؤ گے نظر اپنی

یہ وہ غنچے ہیں جن کو کھل کے مرجھانا نہیں آتا

کہوں کیسے کہ آنسو میری آنکھوں میں نہیں لیکن

صدف کو گوہر نایاب بکھرانا نہیں آتا

ہم اہل غم سدا سنگ الم سے کھیلتے آئے

یہ کس نے کہہ دیا پتھر سے ٹکرانا نہیں آتا

ہمارے جرم الفت کی تو کی شہرت زمانے میں

مگر اپنی جفا پر ان کو شرمانا نہیں آتا

ہم اپنی بد نصیبی سے اب اس منزل پہ آ پہنچے

فسانہ غم کا جس منزل پہ دہرانا نہیں آتا

فریب عہد سے ان کے عزیزؔ اب تو یہ عالم ہے

کسی صورت دل مضطر کو بہلانا نہیں آتا