hum insan hain dil-e-insan ko taDpana nahin aata

ham insāñ haiñ dil-e-insāñ ko taḌpānā nahīñ aatā

karam kī shaan rakhte haiñ sitam Dhānā nahīñ aatā

mire zaḳhmoñ se tum kab tak bachāoge nazar apnī

ye vo ġhunche haiñ jin ko khil ke murjhānā nahīñ aatā

kahūñ kaise ki aañsū merī āñkhoñ meñ nahīñ lekin

sadaf ko gauhar-e-nāyāb bikhrānā nahīñ aatā

ham ahl-e-ġham sadā sang-e-alam se khelte aa.e

ye kis ne kah diyā patthar se Takrānā nahīñ aatā

hamāre jurm-e-ulfat kī to kī shohrat zamāne meñ

magar apnī jafā par un ko sharmānā nahīñ aatā

ham apnī bad-nasībī se ab is manzil pe aa pahuñche

fasāna ġham kā jis manzil pe dohrānā nahīñ aatā

fareb-e-ahd se un ke 'azīz' ab to ye aalam hai

kisī sūrat dil-e-muztar ko bahlānā nahīñ aatā

hum insan hain dil-e-insan ko taDpana nahin aata

karam ki shan rakhte hain sitam Dhana nahin aata

mere zaKHmon se tum kab tak bachaoge nazar apni

ye wo ghunche hain jin ko khil ke murjhana nahin aata

kahun kaise ki aansu meri aankhon mein nahin lekin

sadaf ko gauhar-e-nayab bikhrana nahin aata

hum ahl-e-gham sada sang-e-alam se khelte aae

ye kis ne kah diya patthar se Takrana nahin aata

hamare jurm-e-ulfat ki to ki shohrat zamane mein

magar apni jafa par un ko sharmana nahin aata

hum apni bad-nasibi se ab is manzil pe aa pahunche

fasana gham ka jis manzil pe dohrana nahin aata

fareb-e-ahd se un ke 'aziz' ab to ye aalam hai

kisi surat dil-e-muztar ko bahlana nahin aata