hum jhukate bhi kahan sar ko qaza se pahle

ham jhukāte bhī kahāñ sar ko qazā se pahle

vaqt ne dī hai sazā ham ko ḳhatā se pahle

apnī qismat meñ kahāñ raqs-e-sharar kā manzar

sham-e-jāñ bujh ga.ī dāman kī havā se pahle

ye alag baat ki manzil kā nishāñ koī na thā

kohsār aur bhī the koh-e-nidā se pahle

mudda.ā koī na thā tere sivā kyā karte

dil dhaḌaktā hī rahā harf-e-duā se pahle

rū-ba-rū us ke rahī aa.ina ban kar shāhīn

dekh le apnī nazar jurm-e-jafā se pahle

is kī āñkhoñ meñ ajab sehr hai 'salmā-shāhīn'

ho ga.ī huuñ maiñ shifāyāb davā se pahle

hum jhukate bhi kahan sar ko qaza se pahle

waqt ne di hai saza hum ko KHata se pahle

apni qismat mein kahan raqs-e-sharar ka manzar

sham-e-jaan bujh gai daman ki hawa se pahle

ye alag baat ki manzil ka nishan koi na tha

kohsar aur bhi the koh-e-nida se pahle

muddaa koi na tha tere siwa kya karte

dil dhaDakta hi raha harf-e-dua se pahle

ru-ba-ru us ke rahi aaina ban kar shahin

dekh le apni nazar jurm-e-jafa se pahle

is ki aankhon mein ajab sehr hai 'salma-shahin'

ho gai hun main shifayab dawa se pahle