ہم جو گھبرائیں زمانے سے تو گھر جاتے ہیں

ہم جو گھبرائیں زمانے سے تو گھر جاتے ہیں

جن کے گھر ہی نہیں ہوتے وہ کدھر جاتے ہیں

ساری باتوں کی ہے اک بات کہ کچھ باتوں سے

دل میں اترے ہوئے بھی دل سے اتر جاتے ہیں

دعوے کرتے ہیں وہی لوگ جو کچھ کرتے نہیں

جن کو کرنا ہو وہ کہتے نہیں کر جاتے ہیں

ہم کو ہے ناز بہت ضبط پہ اپنے لیکن

دل اگر ٹوٹے تو پھر اشک بپھر جاتے ہیں

صورت حال نے صورت ہی بدل کے رکھ دی

لوگ حیران سے تکتے ہیں جدھر جاتے ہیں

ہم تو وہ ہیں کہ اگر بحر سجل میں اتریں

ناؤ جس رخ ہو تعاقب میں بھنور جاتے ہیں

زندگی موت کے پہلو میں سمٹ جائے گی

جب بھی یہ سوچتے ہیں سوچ کے مر جاتے ہیں