hum jo mahfil mein teri sina-figar aate hain

ham jo mahfil meñ tirī sīna-figār aate haiñ

rañg-bar-dosh gulistāñ-ba-kanār aate haiñ

chāk-dil chāk-jigar chāk-garebāñ vaale

misl-e-gul aate haiñ mānind-e-bahār aate haiñ

koī ma.ashūq sazāvār-e-ġhazal hai shāyad

ham ġhazal le ke sū-e-shahr-e-nigār aate haiñ

kyā vahāñ koī dil-o-jāñ kā talabgār nahīñ

jā ke ham kūcha-e-qātil meñ pukār aate haiñ

qāfile shauq ke rukte nahīñ dīvāroñ se

saiñkaḌoñ mahbas-o-zindāñ ke dayār aate haiñ

manzileñ dauḌ ke rahrav ke qadam letī haiñ

bosa-e-pā ke liye rāhguzār aate haiñ

ḳhud kabhī mauj-o-talātum se na nikle bāhar

paar jo saare zamāne ko utaar aate haiñ

kam ho kyuuñ abrū-e-qātil kī kamānoñ kā khiñchāo

jab sar-e-tīr-e-sitam aap shikār aate haiñ

hum jo mahfil mein teri sina-figar aate hain

rang-bar-dosh gulistan-ba-kanar aate hain

chaak-dil chaak-jigar chaak-gareban wale

misl-e-gul aate hain manind-e-bahaar aate hain

koi mashuq sazawar-e-ghazal hai shayad

hum ghazal le ke su-e-shahr-e-nigar aate hain

kya wahan koi dil-o-jaan ka talabgar nahin

ja ke hum kucha-e-qatil mein pukar aate hain

qafile shauq ke rukte nahin diwaron se

sainkaDon mahbas-o-zindan ke dayar aate hain

manzilen dauD ke rahraw ke qadam leti hain

bosa-e-pa ke liye rahguzar aate hain

KHud kabhi mauj-o-talatum se na nikle bahar

par jo sare zamane ko utar aate hain

kam ho kyun abru-e-qatil ki kamanon ka khinchao

jab sar-e-tir-e-sitam aap shikar aate hain