hum jo masjid se dar-e-pir-e-mughan tak pahunche

ham jo masjid se dar-e-pīr-e-muġhāñ tak pahuñche

baḌh ke ye baat ḳhudā jaane kahāñ tak pahuñche

kaun kahtā hai rahe rāz-e-mohabbat pinhāñ

ham to kahte haiñ ki ye baat vahāñ tak pahuñche

sun sake kyuuñ na tum āvāz shikast-e-dil kī

ye vo āvāz hai jo gosh-e-girāñ tak pahuñche

hajv-e-mai shaiḳh ne kī toḌ dī maiñ ne tauba

dil bhī ḳhvāhāñ thā ki ye bahs yahāñ tak pahuñche

muñh se niklī huī har baat parā.ī hogī

baat apnī hai vahī jo na zabāñ tak pahuñche

fasl-e-gul ne ye nayā aaj shagūfa chhoḌā

shaiḳh sāhab bhī dar-e-pīr-e-muġhāñ tak pahuñche

is liye aap se kahtā huuñ sazā deñ mujh ko

koī to baat mirī aap kī haañ tak pahuñche

kar chuke jins-e-mohabbat kā vo saudā 'sāhir'

jin kī hir-phir ke nazar sūd-o-ziyāñ tak pahuñche

hum jo masjid se dar-e-pir-e-mughan tak pahunche

baDh ke ye baat KHuda jaane kahan tak pahunche

kaun kahta hai rahe raaz-e-mohabbat pinhan

hum to kahte hain ki ye baat wahan tak pahunche

sun sake kyun na tum aawaz shikast-e-dil ki

ye wo aawaz hai jo gosh-e-giran tak pahunche

hajw-e-mai shaiKH ne ki toD di main ne tauba

dil bhi KHwahan tha ki ye bahs yahan tak pahunche

munh se nikli hui har baat parai hogi

baat apni hai wahi jo na zaban tak pahunche

fasl-e-gul ne ye naya aaj shagufa chhoDa

shaiKH sahab bhi dar-e-pir-e-mughan tak pahunche

is liye aap se kahta hun saza den mujh ko

koi to baat meri aap ki han tak pahunche

kar chuke jins-e-mohabbat ka wo sauda 'sahir'

jin ki hir-phir ke nazar sud-o-ziyan tak pahunche