hum jo oDhe hue ehsas ki chadar nikle

ham jo oḌhe hue ehsās kī chādar nikle

jin ko insān samajhte the vo patthar nikle

ḳhushk mausam thā magar Duub ga.e ahl-e-zamīñ

ham ne patthar jo haTā.e to samundar nikle

bai'at-e-dast-e-yazīdī mujhe manzūr nahīñ

mirī is baat pe har samt se ḳhanjar nikle

bastiyāñ bhī to darindoñ se nahīñ haiñ mahfūz

ghar se nikle bhī koī shaḳhs to kyūñkar nikle

jabr-e-tahzīb kī tārīḳh yahī hai ab tak

ek dīvār girā.ī to ka.ī ghar nikle

un ke chehre bhī nazar aa.e haiñ dhuñdle 'zarrīñ'

ā.ina-ḳhānoñ se jo log sañvar kar nikle

hum jo oDhe hue ehsas ki chadar nikle

jin ko insan samajhte the wo patthar nikle

KHushk mausam tha magar Dub gae ahl-e-zamin

hum ne patthar jo haTae to samundar nikle

bai'at-e-dast-e-yazidi mujhe manzur nahin

meri is baat pe har samt se KHanjar nikle

bastiyan bhi to darindon se nahin hain mahfuz

ghar se nikle bhi koi shaKHs to kyunkar nikle

jabr-e-tahzib ki tariKH yahi hai ab tak

ek diwar girai to kai ghar nikle

un ke chehre bhi nazar aae hain dhundle 'zarrin'

aaina-KHanon se jo log sanwar kar nikle