hum jo pahunche sar-e-maqtal to ye manzar dekha

ham jo pahuñche sar-e-maqtal to ye manzar dekhā

sab se ūñchā thā jo sar nok-e-sināñ par dekhā

ham se mat pūchh ki kab chāñd ubhartā hai yahāñ

ham ne sūraj bhī tire shahr meñ aa kar dekhā

aise lipTe haiñ dar-o-bām se ab ke jaise

hādsoñ ne baḌī muddat meñ mirā ghar dekhā

ab ye sochā hai ki auroñ kā kahā māneñge

apnī āñkhoñ pe bharosā to bahut kar dekhā

ek ik pal meñ utartā rahā sadiyoñ kā azaab

hijr kī raat guzārī hai ki mahshar dekhā

mujh se mat pūchh mirī tishna-labī ke tevar

ret chamkī to ye samjho ki samundar dekhā

dukh hī aisā thā ki 'mohsin' huā gum-sum varna

ġham chhupā kar use hañste hue aksar dekhā

hum jo pahunche sar-e-maqtal to ye manzar dekha

sab se uncha tha jo sar nok-e-sinan par dekha

hum se mat puchh ki kab chand ubharta hai yahan

hum ne suraj bhi tere shahr mein aa kar dekha

aise lipTe hain dar-o-baam se ab ke jaise

hadson ne baDi muddat mein mera ghar dekha

ab ye socha hai ki auron ka kaha manenge

apni aankhon pe bharosa to bahut kar dekha

ek ek pal mein utarta raha sadiyon ka azab

hijr ki raat guzari hai ki mahshar dekha

mujh se mat puchh meri tishna-labi ke tewar

ret chamki to ye samjho ki samundar dekha

dukh hi aisa tha ki 'mohsin' hua gum-sum warna

gham chhupa kar use hanste hue aksar dekha