hum kahan saz pe gane ko ghazal kahte hain

ham kahāñ saaz pe gaane ko ġhazal kahte haiñ

apne dukh-dard bhulāne ko ġhazal kahte haiñ

varna be-jān se lafzoñ kī haqīqat kyā hai

tujh se milne ke bahāne ko ġhazal kahte haiñ

Dhaal kar tujh ko taḳhayyul ke hasīñ paikar meñ

ruuTh jaa.e to manāne ko ġhazal kahte haiñ

aap ke dil meñ utar jaa.e ta.ajjub kyā hai

ham to rag rag meñ samāne ko ġhazal kahte haiñ

sard jazbāt meñ ehsās kī chingārī se

rāt-din aag lagāne ko ġhazal kahte haiñ

saḳht chaTTān yā sañglāḳh zamīñ par 'nāzim'

pyaar kā phuul khilāne ko ġhazal kahte haiñ

hum kahan saz pe gane ko ghazal kahte hain

apne dukh-dard bhulane ko ghazal kahte hain

warna be-jaan se lafzon ki haqiqat kya hai

tujh se milne ke bahane ko ghazal kahte hain

Dhaal kar tujh ko taKHayyul ke hasin paikar mein

ruTh jae to manane ko ghazal kahte hain

aap ke dil mein utar jae tajjub kya hai

hum to rag rag mein samane ko ghazal kahte hain

sard jazbaat mein ehsas ki chingari se

raat-din aag lagane ko ghazal kahte hain

saKHt chaTTan ya sanglaKH zamin par 'nazim'

pyar ka phul khilane ko ghazal kahte hain