ہم کل اس انجمن سے جو پڑھ کر غزل گئے

ہم کل اس انجمن سے جو پڑھ کر غزل گئے

کہتے ہیں ان کی آنکھوں میں ساگر مچل گئے

روئی سحر تو حسن کے منظر بدل گئے

شبنم کی چوٹ کھائی تو پتھر پگھل گئے

ایسے بھی موڑ آئے رہ عشق میں جہاں

ہم خود ہی اپنے آپ سے بچ کر نکل گئے

اگلے سے اب کہاں ہیں وہ تشنہ لبان شوق

شیشے بدل گئے مے و ساغر بدل گئے

اب دیکھ تیرے شہر کی گلیاں اداس ہیں

دیوانے تیرے شہر سے باہر نکل گئے

تم ساتھ تھے تو گویا زمانہ بھی ساتھ تھا

بدلے جو تم تو وقت کے تیور بدل گئے

ہم اہل غم کا کیا کہ بہار ان کے نام پر

بہلا دیا کسی نے تو اکثر بہل گئے