hum khaDe hain hath yun bandhe hue

ham khaḌe haiñ haath yuuñ bāñdhe hue

jaise tū ho rāsta roke hue

kis tarah tai ho safar tanhā.ī kā

duur tak haiñ aa.ine rakkhe hue

rāsta pagDanDiyoñ meñ baT gayā

ik musāfir ke ka.ī phere hue

log ruḳhsat ho chuke bāzār se

ham abhī tak haiñ dukāñ khole hue

saa.e meñ ā.indagī kā dukh nihāñ

dhuup meñ haiñ vāqiye likkhe hue

chāhtā huuñ tere sapne dekhnā

dekhtā huuñ hādse hote hue

tanhā apne sāmne baiThā huuñ maiñ

aur mere haath haiñ phaile hue

jal rahe haiñ apnī hī sochoñ se ham

apnī hī dahlīz meñ baiThe hue

ho ga.iiñ mujh ko sabhī bīmāriyāñ

dūsre bīmār tab achchhe hue

ghun to 'mohsin' jism ko lagnā hī thā

ek muddat ho ga.ī rakkhe ho.e

hum khaDe hain hath yun bandhe hue

jaise tu ho rasta roke hue

kis tarah tai ho safar tanhai ka

dur tak hain aaine rakkhe hue

rasta pagDanDiyon mein baT gaya

ek musafir ke kai phere hue

log ruKHsat ho chuke bazar se

hum abhi tak hain dukan khole hue

sae mein aaindagi ka dukh nihan

dhup mein hain waqiye likkhe hue

chahta hun tere sapne dekhna

dekhta hun hadse hote hue

tanha apne samne baiTha hun main

aur mere hath hain phaile hue

jal rahe hain apni hi sochon se hum

apni hi dahliz mein baiThe hue

ho gain mujh ko sabhi bimariyan

dusre bimar tab achchhe hue

ghun to 'mohsin' jism ko lagna hi tha

ek muddat ho gai rakkhe hoe