hum KHamoshi se jo betab hua karte hain

ham ḳhamoshī se jo betāb huā karte haiñ

bandagānī ke bhī ādāb huā karte haiñ

kitne chamke haiñ do patthar ye mire chehre par

martī āñkhoñ meñ bhī kuchh ḳhvāb huā karte haiñ

koī miTte hue logoñ ko kabhī dekhe sahī

TuuTe hiire haiñ jo ġharqāb huā karte haiñ

ye alag baat namī un kī havāoñ meñ rahe

ḳhushk āñkhoñ meñ bhī sailāb huā karte haiñ

bahte aañsū se pata merā na pūchho hamdam

bhārī patthar to tah-e-āb huā karte haiñ

aise khaliyānoñ kī qismat meñ koī phuul kahāñ

khāre paanī se jo sairāb huā karte haiñ

kaun kahtā hai badaltā nahīñ rañgat paanī

ashk chhalkeñ to vo ḳhūñ-nāb huā karte haiñ

jo dar-e-yār pe dam toḌ diyā kartī haiñ

un nigāhoñ meñ bhī mahtāb huā karte haiñ

hum KHamoshi se jo betab hua karte hain

bandagani ke bhi aadab hua karte hain

kitne chamke hain do patthar ye mere chehre par

marti aankhon mein bhi kuchh KHwab hua karte hain

koi miTte hue logon ko kabhi dekhe sahi

TuTe hire hain jo gharqab hua karte hain

ye alag baat nami un ki hawaon mein rahe

KHushk aankhon mein bhi sailab hua karte hain

bahte aansu se pata mera na puchho hamdam

bhaari patthar to tah-e-ab hua karte hain

aise khaliyanon ki qismat mein koi phul kahan

khaare pani se jo sairab hua karte hain

kaun kahta hai badalta nahin rangat pani

ashk chhalken to wo KHun-nab hua karte hain

jo dar-e-yar pe dam toD diya karti hain

un nigahon mein bhi mahtab hua karte hain