hum KHarabe mein basar kar gae KHamoshi se

ham ḳharābe meñ basar kar ga.e ḳhāmoshī se

halqa-e-mauj meñ gauhar ga.e ḳhāmoshī se

sā.at-e-vasl qayāmat kī ghaḌī Thahrī thī

jism ḳhāmosh the dil Dar ga.e ḳhāmoshī se

āzmā.ish thī kaḌī kū-e-vafā meñ ki jahāñ

kaj-kulah aa.e subuk-sar ga.e ḳhāmoshī se

ham tire hijr meñ āvāra-suḳhan ho nikle

zaḳhm jo tū ne diye bhar ga.e ḳhāmoshī se

shikva-sanj-e-ġham-e-manzil the faqat ham varna

kārvāñ kitne safar kar ga.e ḳhāmoshī se

kū-e-mahbūb kī sham.oñ ko ḳhabar hai ki nahīñ

saa.e kis samt barābar ga.e ḳhāmoshī se

dukh ke sannāTe meñ yaad ā.eñge tujh ko ham se

jo tire dar pe sadā kar ga.e ḳhāmoshī se

jaane zindāñ ke dar-o-bām kā andāz hai kyā

na.ara-zan aa.e jo aksar ga.e ḳhāmoshī se

kuchh to thī lauh-e-azal bā.is-e-barbādī-e-dil

vaar ahbāb bhī kuchh kar ga.e ḳhāmoshī se

koī mun.im na milā dil kā ġhanī yā qismat

dar-ba-dar tere gadāgar ga.e ḳhāmoshī se

hum KHarabe mein basar kar gae KHamoshi se

halqa-e-mauj mein gauhar gae KHamoshi se

saat-e-wasl qayamat ki ghaDi Thahri thi

jism KHamosh the dil Dar gae KHamoshi se

aazmaish thi kaDi ku-e-wafa mein ki jahan

kaj-kulah aae subuk-sar gae KHamoshi se

hum tere hijr mein aawara-suKHan ho nikle

zaKHm jo tu ne diye bhar gae KHamoshi se

shikwa-sanj-e-gham-e-manzil the faqat hum warna

karwan kitne safar kar gae KHamoshi se

ku-e-mahbub ki shamon ko KHabar hai ki nahin

sae kis samt barabar gae KHamoshi se

dukh ke sannaTe mein yaad aaenge tujh ko hum se

jo tere dar pe sada kar gae KHamoshi se

jaane zindan ke dar-o-baam ka andaz hai kya

nara-zan aae jo aksar gae KHamoshi se

kuchh to thi lauh-e-azal bais-e-barbaadi-e-dil

war ahbab bhi kuchh kar gae KHamoshi se

koi munim na mila dil ka ghani ya qismat

dar-ba-dar tere gadagar gae KHamoshi se