ہم کہ مایوس ہوئے ہیں دل ناکام سے بھی

ہم کہ مایوس ہوئے ہیں دل ناکام سے بھی

ایک وحشت ہوئی جاتی ہے ترے نام سے بھی

وہی ڈستی ہوئی نظروں سے بھرا شہر ترا

وہی تنہائی کا احساس در و بام سے بھی

خود کو بھی بھول گئے ترک مراسم کرتے

لو ترے غم میں گئے آخری الزام سے بھی

جانے اس شوخ نے دیکھا مجھے کس تیور سے

اب تو گھبرایا سا رہتا ہوں تہی جام سے بھی

کچھ تو اس خندۂ شاداب سے موسم لہکا

اور کچھ میرے محبت بھرے پیغام سے بھی

ہاں اسی قرب کے شعلوں کی ہوا سے سرمدؔ

دل سلگتا ہے تو جلتے ہیں خنک شام سے بھی