hum ki mayus hue hain dil-e-nakaam se bhi

ham ki māyūs hue haiñ dil-e-nākām se bhī

ek vahshat huī jaatī hai tire naam se bhī

vahī Dastī huī nazroñ se bharā shahr tirā

vahī tanhā.ī kā ehsās dar-o-bām se bhī

ḳhud ko bhī bhuul ga.e tark-e-marāsim karte

lo tire ġham meñ ga.e āḳhirī ilzām se bhī

jaane us shoḳh ne dekhā mujhe kis tevar se

ab to ghabrāyā sā rahtā huuñ tahī jaam se bhī

kuchh to us ḳhanda-e-shādāb se mausam lahkā

aur kuchh mere mohabbat bhare paiġhām se bhī

haañ isī qurb ke sho.aloñ kī havā se 'sarmad'

dil sulagtā hai to jalte haiñ ḳhunuk shaam se bhī

hum ki mayus hue hain dil-e-nakaam se bhi

ek wahshat hui jati hai tere nam se bhi

wahi Dasti hui nazron se bhara shahr tera

wahi tanhai ka ehsas dar-o-baam se bhi

KHud ko bhi bhul gae tark-e-marasim karte

lo tere gham mein gae aaKHiri ilzam se bhi

jaane us shoKH ne dekha mujhe kis tewar se

ab to ghabraya sa rahta hun tahi jam se bhi

kuchh to us KHanda-e-shadab se mausam lahka

aur kuchh mere mohabbat bhare paigham se bhi

han isi qurb ke shoalon ki hawa se 'sarmad'

dil sulagta hai to jalte hain KHunuk sham se bhi