hum kise karte bhala rahbar-e-manzil apna

ham kise karte bhalā rahbar-e-manzil apnā

rāh-e-ulfat meñ na thā koī ba-juz dil apnā

chain detā nahīñ dam-bhar dil-e-bismil apnā

muḳhtasar ye hai ki qaabū meñ nahīñ dil apnā

kyuuñ na āsān ho tārīki-e-shab meñ bhī safar

dāġh-e-dil jab hai charāġh-e-rah-e-manzil apnā

laakh chāhā ki na fariyād kareñ ham lekin

dard-e-furqat na rahā zabt ke qābil apnā

qabr meñ bhī hameñ ārām kī ummīd ho kyā

āshnā pahlū-e-rāhat se nahīñ dil apnā

saath hastī meñ diyā tā-dam-e-āḳhir dil ne

itnā dam-sāz koī hogā ba-mushkil apnā

mujh ko dushvār na thā ishq se pahle kuchh bhī

ab to har kaam nazar aatā hai mushkil apnā

ab to fariyād kī tāqat na rahī ai 'sho.ala'

varna har naala falak se thā muqābil apnā

hum kise karte bhala rahbar-e-manzil apna

rah-e-ulfat mein na tha koi ba-juz dil apna

chain deta nahin dam-bhar dil-e-bismil apna

muKHtasar ye hai ki qabu mein nahin dil apna

kyun na aasan ho tariki-e-shab mein bhi safar

dagh-e-dil jab hai charagh-e-rah-e-manzil apna

lakh chaha ki na fariyaad karen hum lekin

dard-e-furqat na raha zabt ke qabil apna

qabr mein bhi hamein aaram ki ummid ho kya

aashna pahlu-e-rahat se nahin dil apna

sath hasti mein diya ta-dam-e-aKHir dil ne

itna dam-saz koi hoga ba-mushkil apna

mujh ko dushwar na tha ishq se pahle kuchh bhi

ab to har kaam nazar aata hai mushkil apna

ab to fariyaad ki taqat na rahi ai 'shoala'

warna har nala falak se tha muqabil apna