ہم کسی سے بے سبب تو دوستی کرتے نہیں

ہم کسی سے بے سبب تو دوستی کرتے نہیں

دوست ان کو کیوں کہیں جو دشمنی کرتے نہیں

لاکھ تھوڑی سی ملے لیکن محبت چاہئے

نفرتوں میں ہم بسر یہ زندگی کرتے نہیں

ہے ہمارے پاس بے تعبیر خوابوں کا ہجوم

ہم کسی سے شکوہ ہائے مفلسی کرتے نہیں

کچھ نہ کچھ تو تھا کہ اس نے چھوڑ دی دنیا سرائے

بے سبب بھی جینے والے خود کشی کرتے نہیں

ہم غزل گانے کے فن سے نابلد ہیں اس لئے

محفل شعر و سخن میں شاعری کرتے نہیں

ہم کو کچھ پروا نہیں یہ جان جائے یا رہے

سچ اگر کہنا پڑے تو بزدلی کرتے نہیں