hum kisi se be-sabab to dosti karte nahin

ham kisī se be-sabab to dostī karte nahīñ

dost un ko kyoñ kaheñ jo dushmanī karte nahīñ

laakh thoḌī sī mile lekin mohabbat chāhiye

nafratoñ meñ ham basar ye zindagī karte nahīñ

hai hamāre paas be-ta.abīr ḳhvāboñ kā hujūm

ham kisī se shikva-hā-e-muflisī karte nahīñ

kuchh na kuchh to thā ki us ne chhoḌ dī duniyā-sarā.e

be-sabab bhī jiine vaale ḳhud-kushī karte nahīñ

ham ġhazal gaane ke fan se nā-balad haiñ is liye

mahfil-e-sher-o-suḳhan meñ shā.erī karte nahīñ

ham ko kuchh parvā nahīñ ye jaan jaa.e yā rahe

sach agar kahnā paḌe to buzdilī karte nahīñ

hum kisi se be-sabab to dosti karte nahin

dost un ko kyon kahen jo dushmani karte nahin

lakh thoDi si mile lekin mohabbat chahiye

nafraton mein hum basar ye zindagi karte nahin

hai hamare pas be-tabir KHwabon ka hujum

hum kisi se shikwa-ha-e-muflisi karte nahin

kuchh na kuchh to tha ki us ne chhoD di duniya-sarae

be-sabab bhi jine wale KHud-kushi karte nahin

hum ghazal gane ke fan se na-balad hain is liye

mahfil-e-sher-o-suKHan mein shaeri karte nahin

hum ko kuchh parwa nahin ye jaan jae ya rahe

sach agar kahna paDe to buzdili karte nahin