hum ko aata hai jala kar diye ghar ghar rakhna

ham ko aatā hai jalā kar diye ghar ghar rakhnā

ham ne sīkhā na baġhal meñ kabhī ḳhanjar rakhnā

ye to ḳhūbī hai ki shīshoñ se mohabbat rakkho

phir bhī lāzim hai tumheñ haath meñ patthar rakhnā

noch Dāleñgī tujhe tez uqābī nazreñ

duḳhtar-e-sharm lapeTe hue chādar rakhnā

ab kahāñ haiñ vo qalandar kahāñ un ko DhūñDheñ

jin ko āsān thā kuuze meñ samundar rakhnā

bas tumhārā hai yahī aaj ise raushan rakho

kal kī ḳhātir na charāġhoñ ko bujhā kar rakhnā

ye merā azm-e-safar sard na paḌ jaa.e kahīñ

tum mirī raah meñ har din nayā patthar rakhnā

shiddat-e-bhūk se mar jaanā gavāra kar lo

par na ehsāñ kisī kam-zarf kā sar par rakhnā

ghir bhī jaao jo añdheroñ meñ kahīñ tum 'rāhat'

phir bhī nazroñ meñ tum apnī mah-o-aḳhtar rakhnā

hum ko aata hai jala kar diye ghar ghar rakhna

hum ne sikha na baghal mein kabhi KHanjar rakhna

ye to KHubi hai ki shishon se mohabbat rakkho

phir bhi lazim hai tumhein hath mein patthar rakhna

noch Dalengi tujhe tez uqabi nazren

duKHtar-e-sharm lapeTe hue chadar rakhna

ab kahan hain wo qalandar kahan un ko DhunDhen

jin ko aasan tha kuze mein samundar rakhna

bas tumhaara hai yahi aaj ise raushan rakho

kal ki KHatir na charaghon ko bujha kar rakhna

ye mera azm-e-safar sard na paD jae kahin

tum meri rah mein har din naya patthar rakhna

shiddat-e-bhuk se mar jaana gawara kar lo

par na ehsan kisi kam-zarf ka sar par rakhna

ghir bhi jao jo andheron mein kahin tum 'rahat'

phir bhi nazron mein tum apni mah-o-aKHtar rakhna