ہم کو حسرت نہ رہی نشۂ بادہ کرتے

ہم کو حسرت نہ رہی نشۂ بادہ کرتے

ہاں مگر جینے کا بھرپور ارادہ کرتے

میرے کشکول میں خیرات وفا دی تو مگر

کاش تم دل کو ذرا اور کشادہ کرتے

زندگی توڑ گئی لگ کے ہمیں فکر معاش

وہ نہ ہوتی تو تمہیں عشق زیادہ کرتے

چومتے لوگ نگاہوں سے ہمیں بھی اکثر

کچھ حسیں زیب بدن گرچہ لبادہ کرتے

آپ کے آنے نہ آنے کی کوئی بات نہیں

بات تو یہ تھی نبھا لیتے جو وعدہ کرتے

ہم نے روشنؔ تو کیے آپ کی راہوں میں سدا

آنکھ ہوتی تو چراغوں سے افادہ کرتے

جذب ہوتے نہ کہیں آب پشیماں ہو کر

ہم جو صفحات گزشتہ کا اعادہ کرتے

کچھ تو شائق کی جھلک آپ میں آتی گوہرؔ

اپنے انداز تخاطب کو جو سادہ کرتے