hum ko hasrat na rahi nashsha-e-baada karte

ham ko hasrat na rahī nashsha-e-bāda karte

haañ magar jiine kā bharpūr irāda karte

mere kashkol meñ ḳhairāt-e-vafā dī to magar

kaash tum dil ko zarā aur kushāda karte

zindagī toḌ ga.ī lag ke hameñ fikr-e-ma'āsh

vo na hotī to tumheñ 'ishq ziyāda karte

chūmte log nigāhoñ se hameñ bhī aksar

kuchh hasīñ zeb-e-badan garche labāda karte

aap ke aane na aane kī koī baat nahīñ

baat to ye thī nibhā lete jo vā'da karte

ham ne raushan to kiye aap kī rāhoñ meñ sadā

aañkh hotī to charāġhoñ se ifāda karte

jazb hote na kahīñ āb-e-pashemāñ ho kar

ham jo safhāt-e-guzishta kā i'āda karte

kuchh to shā.eq kī jhalak aap meñ aatī 'gauhar'

apne andāz-e-taḳhātub ko jo saada karte

hum ko hasrat na rahi nashsha-e-baada karte

han magar jine ka bharpur irada karte

mere kashkol mein KHairaat-e-wafa di to magar

kash tum dil ko zara aur kushada karte

zindagi toD gai lag ke hamein fikr-e-ma'ash

wo na hoti to tumhein 'ishq ziyaada karte

chumte log nigahon se hamein bhi aksar

kuchh hasin zeb-e-badan garche labaada karte

aap ke aane na aane ki koi baat nahin

baat to ye thi nibha lete jo wa'da karte

hum ne raushan to kiye aap ki rahon mein sada

aankh hoti to charaghon se ifada karte

jazb hote na kahin aab-e-pasheman ho kar

hum jo safhat-e-guzishta ka i'ada karte

kuchh to shaeq ki jhalak aap mein aati 'gauhar'

apne andaz-e-taKHatub ko jo sada karte