hum ko jaanan is nagri mein chalna bhi dushwar hua

ham ko jānāñ is nagrī meñ chalnā bhī dushvār huā

logoñ kā har sang-e-malāmat apne liye dīvār huā

dil ke sab dukhḌe dil meñ haiñ phir bhī unheñ ye shikva hai

chāk-garebāñ kyoñ phirte ho dāman kyoñ hai taar huā

sub.h se halkī halkī kasak thī mīThā mīThā dard sā thā

shaam kā pahlā taarā ubhrā zaḳhm-e-jigar bedār huā

ḳhud ko malāmat kyoñ karte ho apne aap se shikva kyā

jaan ke kab dhokā khāyā hai anjāne meñ pyaar huā

ham ko ḳhirad kī raah dikhāne vaale ye kyoñ bhuul ga.e

apne liye is rāh-e-junūñ meñ sahrā bhī gulzār huā

hum ko jaanan is nagri mein chalna bhi dushwar hua

logon ka har sang-e-malamat apne liye diwar hua

dil ke sab dukhDe dil mein hain phir bhi unhen ye shikwa hai

chaak-gareban kyon phirte ho daman kyon hai tar hua

subh se halki halki kasak thi miTha miTha dard sa tha

sham ka pahla tara ubhra zaKHm-e-jigar bedar hua

KHud ko malamat kyon karte ho apne aap se shikwa kya

jaan ke kab dhoka khaya hai anjaane mein pyar hua

hum ko KHirad ki rah dikhane wale ye kyon bhul gae

apne liye is rah-e-junun mein sahra bhi gulzar hua