hum ko jahan ki ishrat-o-rahat se kya gharaz

ham ko jahāñ kī ishrat-o-rāhat se kyā ġharaz

duniyā-e-be-sabāt kī daulat se kyā ġharaz

gumnām rahnā apne muqaddar meñ hai likhā

ham ko kisī ke gauhar-e-shohrat se kyā ġharaz

maazī kā talḳh jaam hai apne nasīb meñ

ham ko sharāb-e-hāl kī lazzat se kyā ġharaz

ilzām se bache na payambar bhī hai ḳhabar

yārān-e-jahl kī hameñ tohmat se kyā ġharaz

dekhe na koī raushnī-e-dil to kyā huā

andhe jahāñ kī andhī basīrat se kyā ġharaz

ham haiñ alam-nasīb masarrat se be-niyāz

ham ko tumhārī bazm-e-masarrat se kyā ġharaz

ham ne hamesha dahr meñ bāñTā hai pyaar hī

'shāġhil' 'adīb' ham ko adāvat se kyā ġharaz

hum ko jahan ki ishrat-o-rahat se kya gharaz

duniya-e-be-sabaat ki daulat se kya gharaz

gumnam rahna apne muqaddar mein hai likha

hum ko kisi ke gauhar-e-shohrat se kya gharaz

mazi ka talKH jam hai apne nasib mein

hum ko sharab-e-haal ki lazzat se kya gharaz

ilzam se bache na payambar bhi hai KHabar

yaran-e-jahl ki hamein tohmat se kya gharaz

dekhe na koi raushni-e-dil to kya hua

andhe jahan ki andhi basirat se kya gharaz

hum hain alam-nasib masarrat se be-niyaz

hum ko tumhaari bazm-e-masarrat se kya gharaz

hum ne hamesha dahr mein banTa hai pyar hi

'shaghil' 'adib' hum ko adawat se kya gharaz