hum ko KHayal-e-KHidmat-e-ahl-e-jahan to hai

ham ko ḳhayāl-e-ḳhidmat-e-ahl-e-jahāñ to hai

tāqat nahīñ hai paañv meñ muñh meñ zabāñ to hai

mujh se koī ta'alluq-e-sūd-o-ziyāñ to hai

gar mehrbāñ nahīñ hai vo nā-mehrbāñ to hai

dushman agar hai saarā zamāna to ḳhauf kyā

merā bhī is jahāñ meñ koī pāsbāñ to hai

jaane pe mere qaid nahīñ un kī bazm meñ

lekin mizāj-e-nāz pe bār-e-garāñ to hai

apnoñ se ġhair achchhā hai jo ġham-gusār hai

vo merā chāra-sāz nahīñ meherbāñ to hai

siine meñ kyoñ jalan sī ye rahtī hai rāt-din

maanā ki dil meñ aag nahīñ hai dhuāñ to hai

piine do mujh ko āñkhoñ se hī mai-kade meñ aaj

sāġhar nahīñ hai mai nahīñ pīr-e-muġhāñ to hai

apne karam se vo jise chāhe navāz de

jo be-amal hayāt hai vo rā.egāñ to hai

ye naqsh-e-pā hai rāh-rav-e-rāh-e-arsh kā

ab rāh-rau nahīñ hai magar kahkashāñ to hai

manzil koī na samt koī hogā hashr kyā

ye kashtī-e-hayāt hamārī ravāñ to hai

jab sang-dil ke vāste marnā hai Duub kar

dariyā agar nahīñ hai 'musavvir' kuaañ to hai

hum ko KHayal-e-KHidmat-e-ahl-e-jahan to hai

taqat nahin hai panw mein munh mein zaban to hai

mujh se koi ta'alluq-e-sud-o-ziyan to hai

gar mehrban nahin hai wo na-mehrban to hai

dushman agar hai sara zamana to KHauf kya

mera bhi is jahan mein koi pasban to hai

jaane pe mere qaid nahin un ki bazm mein

lekin mizaj-e-naz pe bar-e-garan to hai

apnon se ghair achchha hai jo gham-gusar hai

wo mera chaara-saz nahin meherban to hai

sine mein kyon jalan si ye rahti hai raat-din

mana ki dil mein aag nahin hai dhuan to hai

pine do mujh ko aankhon se hi mai-kade mein aaj

saghar nahin hai mai nahin pir-e-mughan to hai

apne karam se wo jise chahe nawaz de

jo be-amal hayat hai wo raegan to hai

ye naqsh-e-pa hai rah-raw-e-rah-e-arsh ka

ab rah-rau nahin hai magar kahkashan to hai

manzil koi na samt koi hoga hashr kya

ye kashti-e-hayat hamari rawan to hai

jab sang-dil ke waste marna hai Dub kar

dariya agar nahin hai 'musawwir' kuan to hai