ہم کو خیال خدمت اہل جہاں تو ہے

ہم کو خیال خدمت اہل جہاں تو ہے

طاقت نہیں ہے پاؤں میں منہ میں زباں تو ہے

مجھ سے کوئی تعلق سود و زیاں تو ہے

گر مہرباں نہیں ہے وہ نا مہرباں تو ہے

دشمن اگر ہے سارا زمانہ تو خوف کیا

میرا بھی اس جہاں میں کوئی پاسباں تو ہے

جانے پہ میرے قید نہیں ان کی بزم میں

لیکن مزاج‌ ناز پہ بار گراں تو ہے

اپنوں سے غیر اچھا ہے جو غم گسار ہے

وہ میرا چارہ ساز نہیں مہرباں تو ہے

سینے میں کیوں جلن سی یہ رہتی ہے رات دن

مانا کہ دل میں آگ نہیں ہے دھواں تو ہے

پینے دو مجھ کو آنکھوں سے ہی میکدے میں آج

ساغر نہیں ہے مے نہیں پیر مغاں تو ہے

اپنے کرم سے وہ جسے چاہے نواز دے

جو بے عمل حیات ہے وہ رائیگاں تو ہے

یہ نقش پا ہے راہرو راہ عرش کا

اب راہرو نہیں ہے مگر کہکشاں تو ہے

منزل کوئی نہ سمت کوئی ہوگا حشر کیا

یہ کشتیٔ حیات ہماری رواں تو ہے

جب سنگ دل کے واسطے مرنا ہے ڈوب کر

دریا اگر نہیں ہے مصورؔ کنواں تو ہے