hum ko KHush rahne ki aksar jo dua dete hain

ham ko ḳhush rahne kī aksar jo duā dete haiñ

ġham kā sāmān bhī vo ḳhud hī banā dete haiñ

sar jhukāo to ḳhushāmad hai uThāo to ġhurūr

jaane kis biich ke raste kā patā dete haiñ

un ke chehre se Tapaktā hai chhupā buġhz-o-inād

dars duniyā ko mohabbat kā vo kyā dete haiñ

ham zarūrat meñ kabhī kaam the aa.e jin ke

ham ko vo pahlū-tahī kar ke sila dete haiñ

be-takalluf haiñ magar ham bhī unheñ jānte haiñ

vaqt paḌne pe vo kis tarah daġhā dete haiñ

rā.egāñ Thahre sabhī aañkh se Tapke aañsū

dil pe girte haiñ to ehsās nayā dete haiñ

hum ko KHush rahne ki aksar jo dua dete hain

gham ka saman bhi wo KHud hi bana dete hain

sar jhukao to KHushamad hai uThao to ghurur

jaane kis bich ke raste ka pata dete hain

un ke chehre se Tapakta hai chhupa bughz-o-inad

dars duniya ko mohabbat ka wo kya dete hain

hum zarurat mein kabhi kaam the aae jin ke

hum ko wo pahlu-tahi kar ke sila dete hain

be-takalluf hain magar hum bhi unhen jaante hain

waqt paDne pe wo kis tarah dagha dete hain

raegan Thahre sabhi aankh se Tapke aansu

dil pe girte hain to ehsas naya dete hain