hum kufr se waqif hain na islam se waqif

ham kufr se vāqif haiñ na islām se vāqif

haiñ maz.habī parḳhāsh ke anjām se vāqif

tā-umr rahe haiñ jo mai-o-jām se vāqif

ho paa.e na vo gardish-e-ayyām se vāqif

tanvīr-e-sahar jin kī nigāhoñ meñ basī ho

kab hote haiñ vo tīrgi-e-shām se vāqif

manzil pe pahuñchnā hameñ dushvār nahīñ hai

ham haiñ ba-ḳhudā apne har ik gaam se vāqif

paikar meñ har ik shaḳhs ke partav hai usī kā

har shaḳhs hai us hastī-e-be-nām se vāqif

tadbīr kī ḳhūbī ise kahiye ki vafā meñ

ham ho na sake hasrat-e-nākām se vāqif

ho paa.e na vo azmat-e-hastī se shanāsā

jo ho na sake haiñ ġham-o-ālām se vāqif

vijdān pe ik barq sī lahrā.ī thī 'gauhar'

ho paa.e hamīñ haif na ilhām se vāqif

hum kufr se waqif hain na islam se waqif

hain mazhabi parKHash ke anjam se waqif

ta-umr rahe hain jo mai-o-jam se waqif

ho pae na wo gardish-e-ayyam se waqif

tanwir-e-sahar jin ki nigahon mein basi ho

kab hote hain wo tirgi-e-sham se waqif

manzil pe pahunchna hamein dushwar nahin hai

hum hain ba-KHuda apne har ek gam se waqif

paikar mein har ek shaKHs ke partaw hai usi ka

har shaKHs hai us hasti-e-be-nam se waqif

tadbir ki KHubi ise kahiye ki wafa mein

hum ho na sake hasrat-e-nakaam se waqif

ho pae na wo azmat-e-hasti se shanasa

jo ho na sake hain gham-o-alam se waqif

wijdan pe ek barq si lahrai thi 'gauhar'

ho pae hamin haif na ilham se waqif