hum kya ki hadd-e-nazar tak sarab ki surat

ham kyā ki hadd-e-nazar tak sarāb kī sūrat

na ḳhaak ḳhaak na ab aab aab kī sūrat

khulā thā maiñ bhī kabhī ik gulāb kī sūrat

tamām 'umr jalā āftāb kī sūrat

kināra kaaT rahā huuñ vajūd kā apne

paTak rahā huuñ maiñ sar mauj-e-āb kī sūrat

zabāñ jo suukh rahī hai to kuchh sabab bhī hai

samundaroñ meñ rahā huuñ habāb kī sūrat

barūn-e-shahr hī kyā ki darūn-e-shahr bhī hai

sulagte lamhoñ kā sūraj itaab kī sūrat

ye ḳhālī ḳhālī sī shab lamha-e-siyah se bharī

dikhā.ī tak nahīñ detī hai ḳhvāb kī sūrat

zamīn-e-jism ke andar jo zalzale haiñ bapā

unheñ chhupā.egī kab tak janāb kī sūrat

hum kya ki hadd-e-nazar tak sarab ki surat

na KHak KHak na ab aab aab ki surat

khula tha main bhi kabhi ek gulab ki surat

tamam 'umr jala aaftab ki surat

kinara kaT raha hun wajud ka apne

paTak raha hun main sar mauj-e-ab ki surat

zaban jo sukh rahi hai to kuchh sabab bhi hai

samundaron mein raha hun habab ki surat

barun-e-shahr hi kya ki darun-e-shahr bhi hai

sulagte lamhon ka suraj itab ki surat

ye KHali KHali si shab lamha-e-siyah se bhari

dikhai tak nahin deti hai KHwab ki surat

zamin-e-jism ke andar jo zalzale hain bapa

unhen chhupaegi kab tak janab ki surat