ہم لوگ جس گھڑی ترے حلقے میں آ گئے

ہم لوگ جس گھڑی ترے حلقے میں آ گئے

ایسا لگا کہ خلد کے خطے میں آ گئے

ہم لوگ وہ ہیں جن پہ جوانی نہ آ سکی

ہم لوگ بچپنے سے بڑھاپے میں آ گئے

وہ شخص ہم کو چھوڑ کے پیچھے ہٹا تو ہم

افلاک سے زمین پہ لمحے میں آ گئے

دنیا فقط فریب ہے دھوکا ہے دوستو

بچے تبھی تو روتے ہیں دھوکے میں آ گئے

ان پر نہیں پڑا کبھی خوشیوں کا سایہ پھر

وہ لوگ جو کبھی مرے سائے میں آ گئے

ہر دور میں یہ عشق انہیں لوٹتا رہا

ہر دور میں یہ عشق کے جھانسے میں آ گئے

جتنے سوال ہم نے کیے تھے فقیر سے

سب کے جواب ایک ہی نقطے میں آ گئے

خوشیاں کسی کے حصے میں آئیں تمام تر

رنج و الم وجیہؔ کے حصے میں آ گئے