hum log jis ghaDi tere halqe mein aa gae

ham log jis ghaḌī tire halqe meñ aa ga.e

aisā lagā ki ḳhuld ke ḳhitte meñ aa ga.e

ham log vo haiñ jin pe javānī na aa sakī

ham log bachpane se buḌhāpe meñ aa ga.e

vo shaḳhs ham ko chhoḌ ke pīchhe haTā to ham

aflāk se zamīn pe lamhe meñ aa ga.e

duniyā faqat fareb hai dhokā hai dosto

bachche tabhī to rote haiñ dhoke meñ aa ga.e

un par nahīñ paḌā kabhī ḳhushiyoñ kā saaya phir

vo log jo kabhī mire saa.e meñ aa ga.e

har daur meñ ye 'ishq unheñ lūTtā rahā

har daur meñ ye 'ishq ke jhāñse meñ aa ga.e

jitne savāl ham ne kiye the faqīr se

sab ke javāb ek hī nuqte meñ aa ga.e

ḳhushiyāñ kisī ke hisse meñ aa.eñ tamām-tar

ranj-o-alam 'vajīh' ke hisse meñ aa ga.e

hum log jis ghaDi tere halqe mein aa gae

aisa laga ki KHuld ke KHitte mein aa gae

hum log wo hain jin pe jawani na aa saki

hum log bachpane se buDhape mein aa gae

wo shaKHs hum ko chhoD ke pichhe haTa to hum

aflak se zamin pe lamhe mein aa gae

duniya faqat fareb hai dhoka hai dosto

bachche tabhi to rote hain dhoke mein aa gae

un par nahin paDa kabhi KHushiyon ka saya phir

wo log jo kabhi mere sae mein aa gae

har daur mein ye 'ishq unhen luTta raha

har daur mein ye 'ishq ke jhanse mein aa gae

jitne sawal hum ne kiye the faqir se

sab ke jawab ek hi nuqte mein aa gae

KHushiyan kisi ke hisse mein aaen tamam-tar

ranj-o-alam 'wajih' ke hisse mein aa gae