hum mubtala-e-dard hain inkar bhi nahin

ham mubtalā-e-dard haiñ inkār bhī nahīñ

lekin kisī pe tohmat-e-āzār bhī nahīñ

ham chāhte haiñ aap ko inkār bhī nahīñ

lekin laboñ pe jur.at-e-iz.hār bhī nahīñ

aatī to haiñ laboñ pe mire siskiyāñ magar

āñkhoñ meñ āñsuon ke gunahgār bhī nahīñ

dil chāhtā hai ġham ke ḳhazāne ko bech duuñ

lekin mire nasīb kā bāzār bhī nahīñ

be-shak ġham-e-hayāt kā tum hī 'ilāj ho

merā nasīb ye ki maiñ bīmār bhī nahīñ

ḳhushbū kī aarzū hai na chāhat hai nuur kī

sach sach kaho ki mujh se tumheñ pyaar bhī nahīñ

hum mubtala-e-dard hain inkar bhi nahin

lekin kisi pe tohmat-e-azar bhi nahin

hum chahte hain aap ko inkar bhi nahin

lekin labon pe jurat-e-izhaar bhi nahin

aati to hain labon pe mere siskiyan magar

aankhon mein aansuon ke gunahgar bhi nahin

dil chahta hai gham ke KHazane ko bech dun

lekin mere nasib ka bazar bhi nahin

be-shak gham-e-hayat ka tum hi 'ilaj ho

mera nasib ye ki main bimar bhi nahin

KHushbu ki aarzu hai na chahat hai nur ki

sach sach kaho ki mujh se tumhein pyar bhi nahin