hum mue phirte hain aur KHwahish-e-jaan hai usko

ham muue phirte haiñ aur ḳhvāhish-e-jāñ hai us ko

ab talak bhī vahī jiine kā gumāñ hai us ko

ai dil afsurdagī-e-dāġh se kyuuñ hai tū malūl

jo gul is baaġh meñ aayā hai ḳhizāñ hai us ko

qissa-e-barhana-pā.ī ko mire ai majnūñ

ḳhaar se pūchh ki sab nok-e-zabāñ hai us ko

aage us gul ke na maarā kabhū ġhunche ne to dam

chāhe bulbul so kahe tāb-e-bayāñ hai us ko

ai falak bojh do aalam kā tū 'qā.em' pe na Daal

apnī hastī bhī kuchh in rozoñ garāñ hai us ko

kar ke he he ai nam-e-ashk tū rove mujh ko

aaj agar sail meñ ḳhuuñ ke na Dubove mujh ko

ḳhaak juuñ aa.ina milnā mujhe rakhtā hai shugūñ

tīra-tar huuñ maiñ jo paanī se to dhove mujh ko

fā.eda gul kā na mujh se hai na saa.e kī umiid

kah do dahqāñ se ki ba-hūda na bove mujh ko

garmī-e-nāla se maiñ aaj jalā jaatā huuñ

ko dam-e-sard ki aa kar vo samove mujh ko

saath hai sañg o sharar kā ye kaho us but se

kyā ho āġhosh meñ gar le ke vo sove mujh ko

na mulāqāt na ashfāq na va.ada na payām

kyūñki taskīn tire hijr meñ hove mujh ko

ḳhātam-e-dast-e-sulaimāñ se huuñ 'qā.em' maiñ aziiz

saḳht pachhtā.e vo jo haath se khove mujh ko

hum mue phirte hain aur KHwahish-e-jaan hai us ko

ab talak bhi wahi jine ka guman hai us ko

ai dil afsurdagi-e-dagh se kyun hai tu malul

jo gul is bagh mein aaya hai KHizan hai us ko

qissa-e-barhana-pai ko mere ai majnun

KHar se puchh ki sab nok-e-zaban hai us ko

aage us gul ke na mara kabhu ghunche ne to dam

chahe bulbul so kahe tab-e-bayan hai us ko

ai falak bojh do aalam ka tu 'qaem' pe na Dal

apni hasti bhi kuchh in rozon garan hai us ko

kar ke he he ai nam-e-ashk tu rowe mujh ko

aaj agar sail mein KHun ke na Dubowe mujh ko

KHak jun aaina milna mujhe rakhta hai shugun

tira-tar hun main jo pani se to dhowe mujh ko

faeda gul ka na mujh se hai na sae ki umid

kah do dahqan se ki ba-huda na bowe mujh ko

garmi-e-nala se main aaj jala jata hun

ko dam-e-sard ki aa kar wo samowe mujh ko

sath hai sang o sharar ka ye kaho us but se

kya ho aaghosh mein gar le ke wo sowe mujh ko

na mulaqat na ashfaq na wada na payam

kyunki taskin tere hijr mein howe mujh ko

KHatam-e-dast-e-sulaiman se hun 'qaem' main aziz

saKHt pachhtae wo jo hath se khowe mujh ko