ہم موئے پھرتے ہیں اور خواہش جاں ہے اس کو

ہم موئے پھرتے ہیں اور خواہش جاں ہے اس کو

اب تلک بھی وہی جینے کا گماں ہے اس کو

اے دل افسردگیٔ داغ سے کیوں ہے تو ملول

جو گل اس باغ میں آیا ہے خزاں ہے اس کو

قصۂ برہنہ پائی کو مرے اے مجنوں

خار سے پوچھ کہ سب نوک زباں ہے اس کو

آگے اس گل کے نہ مارا کبھو غنچے نے تو دم

چاہے بلبل سو کہے تاب بیاں ہے اس کو

اے فلک بوجھ دو عالم کا تو قائمؔ پہ نہ ڈال

اپنی ہستی بھی کچھ ان روزوں گراں ہے اس کو

کر کے ہے ہے اے نم اشک تو رووے مجھ کو

آج اگر سیل میں خوں کے نہ ڈبووے مجھ کو

خاک جوں آئنہ ملنا مجھے رکھتا ہے شگوں

تیرہ تر ہوں میں جو پانی سے تو دھووے مجھ کو

فائدہ گل کا نہ مجھ سے ہے نہ سائے کی امید

کہہ دو دہقاں سے کہ بے ہودہ نہ بووے مجھ کو

گرمئ نالہ سے میں آج جلا جاتا ہوں

کو دم سرد کہ آ کر وہ سمووے مجھ کو

ساتھ ہے سنگ و شرر کا یہ کہو اس بت سے

کیا ہو آغوش میں گر لے کے وہ سووے مجھ کو

نہ ملاقات نہ اشفاق نہ وعدہ نہ پیام

کیوں کہ تسکین ترے ہجر میں ہووے مجھ کو

خاتم دست سلیماں سے ہوں قائمؔ میں عزیز

سخت پچھتائے وہ جو ہاتھ سے کھووے مجھ کو