ہم نفس ہے نہ ہم نشیں کوئی

ہم نفس ہے نہ ہم نشیں کوئی

محرم راز دل نہیں کوئی

میری روداد پوچھنے والے

مجھ سا اندوہ گیں نہیں کوئی

زخم دل نے جہاں جہاں کھائے

یاد آیا وہیں وہیں کوئی

ڈھونڈھتا ہے تمازت غم میں

سایۂ زلف عنبریں کوئی

دل ہے پھر مبتلائے وہم و گماں

پھر دلائے مجھے یقیں کوئی

لا مکاں ہے فریب فکر و نظر

خلوت دل میں ہے مکیں کوئی

بات دل کی زباں پہ کیا آئے

دل میں بیٹھا ہے نکتہ چیں کوئی

اشک حسرت سمیٹنے کو طفیلؔ

مل ہی جائے گی آستیں کوئی