hum naqsh-e-pa the rahguzar hi mein rah gae

ham naqsh-e-pā the rāhguzar hī meñ rah ga.e

nikle safar pe aur safar hī meñ rah ga.e

shāyad unheñ thā hadisa-e-zabt-e-ġham kā Dar

aañsū laraz ke dīda-e-tar hī meñ rah ga.e

manzil pe vo bhī pahuñcheñge kis ko yaqīn ho

pīchhe jo ibtidā-e-safar hī meñ rah ga.e

saare javāb de na sake zindagī ke ham

kitne savāl dīda-e-tar hī meñ rah ga.e

parvāz un ke saath kare āshiyāñ kī ḳhaak

vo bāl-o-par jo barq-o-sharar hī meñ rah ga.e

dahlīz ke charāġh kā 'saulat' ḳhayāl thā

manzil kā shauq le ke bhī ghar hī meñ rah ga.e

hum naqsh-e-pa the rahguzar hi mein rah gae

nikle safar pe aur safar hi mein rah gae

shayad unhen tha hadisa-e-zabt-e-gham ka Dar

aansu laraz ke dida-e-tar hi mein rah gae

manzil pe wo bhi pahunchenge kis ko yaqin ho

pichhe jo ibtida-e-safar hi mein rah gae

sare jawab de na sake zindagi ke hum

kitne sawal dida-e-tar hi mein rah gae

parwaz un ke sath kare aashiyan ki KHak

wo baal-o-par jo barq-o-sharar hi mein rah gae

dahliz ke charagh ka 'saulat' KHayal tha

manzil ka shauq le ke bhi ghar hi mein rah gae