ہم نے الفاظ غلط منہ سے نکالے تو نہیں

ہم نے الفاظ غلط منہ سے نکالے تو نہیں

صرف ہاتھوں میں رہے سنگ اچھالے تو نہیں

میری منزل نے مرے عزم پہ یوں طنز کیا

میرے مشتاق ترے پاؤں میں چھالے تو نہیں

آپ کی ذات میں زہریلے عناصر کیوں ہیں

مار مسموم کبھی آپ نے پالے تو نہیں

کوئی مہتاب اگائے گا اسے مانیں گے

تیرگی ہے ابھی ہر سمت اجالے تو نہیں

جن کے اطوار ہیں شہباز کی فطرت جیسے

یہ محافظ ہی کہیں لوٹنے والے تو نہیں

ہم تو اجداد کی اغلاط پہ خاموش رہے

اب زبانوں میں نئی نسل کے تالے تو نہیں

ان کے دامن میں وہی عجز ہے اب بھی اے شادؔ

جیسے مغرور پجاری ہیں شوالے تو نہیں