humne alfaz ghalat munh se nikale to nahin

ham ne alfāz ġhalat muñh se nikāle to nahīñ

sirf hāthoñ meñ rahe sang uchhāle to nahīñ

merī manzil ne mire azm pe yuuñ tanz kiyā

mere mushtāq tire paañv meñ chhāle to nahīñ

aap kī zaat meñ zahrīle anāsir kyoñ haiñ

mār-e-masmūm kabhī aap ne paale to nahīñ

koī mahtāb ugā.egā use māneñge

tīrgī hai abhī har samt ujāle to nahīñ

jin ke atvār haiñ shahbāz kī fitrat jaise

ye muhāfiz hī kahīñ lauTne vaale to nahīñ

ham to ajdād kī aġhlāt pe ḳhāmosh rahe

ab zabānoñ meñ na.ī nasl ke taale to nahīñ

un ke dāman meñ vahī ijz hai ab bhī ai 'shād'

jaise maġhrūr pujārī haiñ shivāle to nahīñ

hum ne alfaz ghalat munh se nikale to nahin

sirf hathon mein rahe sang uchhaale to nahin

meri manzil ne mere azm pe yun tanz kiya

mere mushtaq tere panw mein chhaale to nahin

aap ki zat mein zahrile anasir kyon hain

mar-e-masmum kabhi aap ne pale to nahin

koi mahtab ugaega use manenge

tirgi hai abhi har samt ujale to nahin

jin ke atwar hain shahbaz ki fitrat jaise

ye muhafiz hi kahin lauTne wale to nahin

hum to ajdad ki aghlat pe KHamosh rahe

ab zabanon mein nai nasl ke tale to nahin

un ke daman mein wahi ijz hai ab bhi ai 'shad'

jaise maghrur pujari hain shiwale to nahin